رمزيات بلاك بيري خدمة تفسير الأحلام تصميم مواقع وصفات طبخ أعلن معنا


العودة   منتديات فريج دبي > فريج أم سعيد > قصص وروايات > قلم رصاص يسرد روايات

قلم رصاص يسرد روايات يختص في طرح الروايات


آخر المشاركات المطروحة في منتديات فريج دبي .



إضافة رد
 
أدوات الموضوع
قديم 19-04-2010, 03:50 PM   رقم المشاركة : 17
Сгαżч ƒшαℓℓα
~ • غـٍُالٌٍُيً مـٌٍُِألـًٍُِقَ • ~
 
الصورة الرمزية Сгαżч ƒшαℓℓα 





معلومات اضافية 
  النقاط : 2150
  الجنس :
  الدولة :
  الحالة :
الرسالة الشخصية

التقييم

افتراضي

 

 

البارت الثاني

راشد من سمع صوت مسجات وحشره من حجرة اخته سار ودق الباب عليها

راشد : سااروه .. ساروه
ساره : يايه يايه .. وبطلت الباب
راشد : شو تسوين ؟ ..
ساره : يالسه ارمس ميروه بالمسجات .. ليش ؟
راشد : وانا اقول اسمع صوت مسجات وحشره
ساره : ههههه .. السموحه الحين بحطه عـ السايلنت
راشد : مسموحه الشيخه .. الا تعالي شخبار الثانويه العامه وياج ؟
ساره : والله الحمدالله بخير
راشد : الحمدالله .. (وتم صاخ)
ساره : رشود يالشيبه متى بتعرس ابا اشوف عيالك ؟
راشد : هههههههه .. مالت عليج .. انا الحين الشيبه يالعيوز .. والله فديتني بعدني فـ الـ عشرينات
ساره : هههههههه .. اتمصخر بلاك ؟
راشد : هيه ادريبج
رن تلفون ساره شل راشد التلفون وشاف المتصل حياتي ميروه .. طبعا كان سلطان المتصل ، حظرته متصل لأنه زاغ ليش ساره ماردت عليه ، راشد قال لـ ساره ردي عادي انا بتم يالس
ساره بارتباك شديد : هلا ميروه
سلطان : الحين انا ميروه ؟
ساروه : الحمدالله شحالج انتي ؟
سلطان : حد عندج ؟
ساره : هيه
سلطان : اهاا .. عسب جي ما رديتي .. اوكي بس حبيت اتطمن
ساره : هيه اليوم لاتنسين بعد صلاه العشا
سلطان : هههههههههـ .. فديت هالصوت انا
ساره : اوكي عيل بخليج رشود عندي
سلطان : خخخخ .. ويا هالرشود النحس .. بااي
ساره : بااي

اتطمن سلطان لأنه كان زايغ ان راشد كشف ساره .. عقب سلم على عمه وسيف وترخص ورد البيت عسب يأدب ميروه على الي سوته ركب سيارته الي كانت رنج سبورت سوده آخر مديل وطبعا حاطله مخفي كامل شغل السياره وبطل الاف ام كانوا حاطين اغنيه الوسمي سلام العشق


سلام العشق واعماقه
يضم القلب واشواقه
تجيك الروح مشتاقه
تهديك القصيد الوان
على درب الهوا جينا
من اول ما تلاقينا
تغير كل مافينا
عشنا فرحة الازمان


وتوجه للبيت وعقب نص ساعه تقريبا وصل البيت وحصل ميروه فـ ويهه وسار عندها ومط شعرها وهيه زاايغه
سلطان : ليش تجذبين عليه ؟
ميره : والله انا اسفه ما اعيدها موول
سلطان : حبها عـ خدها .. فديتج والله لولاج ماصار كل ها
ميره استانست والفضول طبعا لاعب دور : شو صار ؟
سلطان : شو يخصج ؟
ميره اتقفطت : اووه لازم يقفط
سلطان : ساروتي اتقلج ان اليوم عقب صلاة العشا بتسير المول ويا اخوها سيف تباج اتسيرين وياها
ميره : وانت اشدراك .. رمست سارووه ؟!!
سلطان شق الحلج : هيه وقالتلي احبك بعد
ميره انصدمت : احللللف
سلطان : والله العظيم
جان ميره اتمط شعر سلطان : سلطون اتصدق اول مره ادري ان شعرك حلوو والله انه خبااال انا اباا شرات شعرك
حرك سلطان شعره مغايظة بـ ميره : ها الشعر مايظهر لأي حد بس ناس وناس
ميره : ماااالت
سلطان : عـ ويهج


(ميره كانت واااايد ويا اخوها سلطان عكس احمد .. تقريبا كل مايصير لها شي اتخبر سلطان وسلطان يخبرها ب كل شي وهم واايد ويا بعض وميره كبر ساره عمرها 18 سنه وهيه فـ ثانويه عامه)


فـ هالوقت حدر احمد وحرمته حصه وولدهم عبيد
عبيد وااايد يحب عمه سلطان لأنه واايد يدلعه ومسويله سالفه
عبيد من شاف سلطان طاح فـ حضنه وتم يتحرطم عقب قال انه يبا يرقد عنده
سار سلطان رقد عبيد على شبيريته وتلبس وظهر عسب يسير المول ويا سيف عند الربع ..


فـ بيت بو راشد
فـ هالوقت اتصلت اخت بوراشد ( مريم )

مريم ( ام مايد ): مرحبا
ام راشد : مراحب
ام مايد : شحالج الغاليه ؟ .. ربج الا بخير ؟
ام راشد : والله الحمدالله على كل حال .. ومن صوبج ؟
ام مايد : والله الحمدالله .. شحال العرب عندكم عساهم كلهم بخير وسهاله ؟
ام راشد : الحمدالله كلهم بخير
ام مايد : الحمدالله .. انزين انا داقه عليج عسب اقلج ان باجر انتوا معزومين عالغدا عندي فـ البيت
ام راشد : انشالله خير
ام مايد : يبي عيالج معاج
ام راشد : تامرين امر يالغاليه
ام مايد : يالله عيل فمان الله
ام راشد : فمان الكريم

بندت ام راشد من مريم ( ام مايد ) وسارت فـ حجره ساره لقت ساره وراشد يالسين يسولفون مع بعض يلست معاهم وقالتلهم ان عموتهم مريم عازمتنهم باجر
راشد : امييه باجر انا شبه مشغول يعني ما اروم ايي
ساره : انا بعد مابا ايي لأن عقب باجر مدارس لو عقب باجر اجازه اوكي عادي
ام راشد : اشو هالمنكر بعد ؟! .. بتون يعني بتون
راشد + ساره : اميييه
ام راشد : نعم .. شبلاكم ؟! .. فشله يعني انا وابوج انسير روحنا عيب مايصير
راشد + ساره باستسلام : خلاص اوكي
حدرت ليني عليهم


((ليني: بشكاره قوم بو محمد و هيه اندنيسيه واسمها ليني وعمرها 40 وهيه تشتغل عندهم من 9 سنسن يعني عشره عمر ))


ليني : ساره ميره يبي انتي عـ الفون
راشد : هاي ميروه شو سالفتها كل شوي لازم اترمسج ؟!
ساره بدلع : ليش اتغار .. الناس يحبوني
راشد : مالت
ساره : ههههه .. عليك .. وسارت صوب تلفون البيت عسب اترمس ميره

ام راشد : ليني قولي حق مرتينا لاتسوي غدا باجر نحن بنسرح العين بنسير عند مريم ام مايد
ليني : جين ماما
ام راشد : بس خلها تسوي الغدا لكم ولدريول
ليني : انشالله
وسارت ليني المطبخ عسب اتخبر مرتينا

صوب ساره

ميره : ساروه عن النذاله والله حراام قوليلي شو صار ؟
ساره : هههههه .. انزين بقلج بس يوم بنتلاقا فـ المول
ميره : افف .. ليش ؟
ساره : لأن رشود وماما هني اخاف يسمعوني
ميره : اهاا .. اوكي .. نحن بنسير امارات مول .. صح ؟
ساره : هيه
ميره : تعاالي عموه مريم دقت عليكم وقالت ان باجر الغدا فـ بيتهم ؟
ساره : هيه .. اففف مابا اسير لأن عقب باجر علينا مدارس هب شي جي
ميره : هيه والله
ساره : شو نسوي بعد الوالده غاصبتنا انسير
ميره : هههه .. فديت مرت عمي
ساره : ها شوبتلبسين لما بنسير المول ؟
ميره : ماروم اتعدل عدل لأن سلطان وياي .. كريييهه كله يغار
ساره من سمعت طاري سلطان صخت
ميره : ساااااااارووه
ساره : عيونها
ميره : شو رقدتي ؟ .. ولا يوم قلت سلطان سرحتي فيه
ساره : جب جب .. هو لازم اي ويانا ؟ .. اليوم شفته واايد
ميره : هههههههه .. طااع الحبيبه النذله .. ماعلييه ان ما خبرته
ساره : ميرووه هب اتسوينها
ميره : بتشوفين يالدبه .. يلا عيل بخليج باي
ساره : اوكي .. اشوفج فالمول انشالله .. بااي

بندت الخط وسارت حجرتها ورقدت ساعه عقب نشت جان اتشوف مبايلها حصلت 6 مسكولات حليلها زاغت اول مره جي الا هيه ساعه وحده وجيه 2 من ظبيه بنت خالتها و 1 من مزون ربيعتها و3 من سيف اخوها
<< هيه ما انتبهت عـ المسكولات لأنها كانت حاطه مبايلها عـ السايلنت

نشت ساره وسارت غسلت ويها واتلبست عسب تظهر ويا سيف اتسير المول لبست بنطلون جنز وقميص بني ورسمت عيونها بالجحال وحطت جلوس بني فاتح ولبست عباه فيها حركات عـ الجم باللون البني طبعا العباه والشيله طقم وتعطرت وشلت شنطه بنيه روعه حطت فيها الجحال والجلوس ومنضره صغيره و مبايلها و بوكها و لبست الشيله وظهرت قصتها يوم نزلت راشد تم يطالعها من فوق لين تحت
راشد : شو وين سايره عرس ؟
ساره ببراءه : لا المول
راشد : سايره المول وجي ؟!
ساره: هيه فيها شي ؟
راشد : هيه مب شي الا اشيا .. ماعنا بنات يتكشخن لهاي الدرجه يلايلا سيري غيري لبسج ولبسي شي محترم ومسحي الي حاطته
بهالوقت حدر سيف ووياه سلطان سلطان لما شاف ساره كان بيغمى عليه من جمالها مشالله عليها كانت قمر بس بنفس الوقت كان مفول انها بتسير المول جييه
سيف + سلطان : مرحباا
راشد + ساره : مراحب
سيف : لالالا الصراحه ساروه اتطيح الطير من السما لو ما كنتي اختي جان رقمتج
ساره بدلع : احم احم جي الاخوان .. (وتطالع راشد) هب شراتك يالدب
راشد لاحظ ان سلطان كان يطالع ساره وحرج : اقلج سيري بدلي ترى ماشي ظهره
ساره ماكانت منتبهه على سلطان لما شافته اتخبلت هيه الثانيه كان لابس بنطلون جينز وبدي بني رهييب << الاخ مطقم وياها .. وكان راد شعره عـ ورا ولابس نظاره شمسيه ساره بغت تتخبل ..
بس افتشلت لأن راشد جي قالها ..
ساره : رشوود دخيلك خلني اسير الحين
راشد : ماشي بسرعه سيري بدلي
حرجت ساره وسارت بدلت العباه ولبست عباه مسكره وعليها حركات من ورا بالبني ونزلت تحت بس راشد طنش وماعلق
عقب ساروا سيف + سلطان + ساره لبيت بواحمد عسب يشلون ميره
اتصل سلطان بميره وقالها تظهر لما ظهرت كانت كيوت
كانت لابسه تنوره رصاصيه وتوب واحمر وراسمه عيونها بالجحال و حاطه جلوس احمر فاتح ولا بسه عباه سوده ومن ورا عليها تطريز بالأحمر وكانت ماسكه شنطه رصاصيه ركبت السياره ويلست وسلمت .. ويلسوا يسولفون سيف و سلطان
روحهم ، وساره وميره روحهم الين ماوصلوا المول
طبعا وصلوا المول ونزلوا من الموتر سيف وسلطان كانوا يمشون جدام ميره وساره
وهم يتمشون ساره كانت تقول لميره عن الي صار اليوم بينها وبين سلطان
عقب شافت محل دبنهامز
ساره : سيفو سيفو
سيف : نعم
ساره : انا وميروه بنسير دبنهامز
سيف : اممم اوكي انا وسلطان بنيلس فـ ستار بكس بسرعه خذوا الي تبونه وتعالوا ولا تتأخرون فاهمه
ساره : اوكي
سيف : بس تعالي مبايلج وياج ؟
ساره : هيه
سيف : يلا ذلفي عن ويهي
سارت ساره ويا ميره دبنهامز تموا يشلون الي يبونه
ساره شلت ( جحال اسود وازرق وابيض و جلوس وردي و بلاشر وردي فاتح وخوخي وخذت عطرين مس ديور وسنما طبعا ميره خذت شراتها عقب ظهروا من دبنهامز وهيه تتمشى شافت برشكا قالت حق ميروه بنسير بسرعه وبناخذ لنا بنطلون وتوب
ميره وافقت بس قالتلها بسرعه ساروا برشكا وشروا الي يبونه وهم سايرين ستار بكس كافيه مر واحد صوب ساره وتم يرقمها ويلحقها شافه سلطان جان يحرج ويسير يتضارب ويا الشاب
سلطان : شو انت ماتستحي ماتخيل .. ريال طول وعرض واتغازل بنات الناس ؟
: سلطووون السموحه الشيخ والله ماكنت ادري انها تقربلك .. بس عليها جماال والله انها قمر
سلطان : المشكله هيه ماتقربلي انا بس هااي تقربلك انت بعد يالحيوان .. ( وجان يصفعه )
وتموا يتضاربون
هنييه ساره زاغت جان تشرد عند سيف
سيف : ساروه بلاج ؟
ساره وهيه زايغه : هاا .. لالا .. مافيه شي
قرب سلطان صوبهم وهو محرج جان يقول لسيف انه يبا يرد البيت سيف حاول يعارف شو السالفه من سلطان بس سلطان ماطاع يرمس
ساروا سلطان وميره بيتهم .. وسيف وساره بيتهم

فـ بيت بو راشد

سيف : سااروه والله ان في شي ولاازم اعرفه
ساره: اوووه اقلك ماشي
سيف : عيل ليش سلطان كان محرج وخلانا نرد البيت ؟
ساره : بقلك الي صار وامري لله .. بس والله انا مايخصني فـ كل ها
سيف : قولي بسرعه ترااج ذبحتيني
ساره قالتله بالي صار
سيف تم مستغرب : يعني منو هاه ؟
ساره : والله علمي علمك
سيف : انزين سمعي مره ثانيه لما بنسير المول ولا اي مكان لاتتكشخين جي فاهمه ترى والله ما اظهرج وياي خل رشود يظهرج
ساره : حرام عليكم الحين وين اتكشخ .. بس اوكي خلاص
سيف : هيه جي اباج

وسار سيف عنها ودق لسلطان بس سلطان مارد عليه ودقله كمن مره بس ماشي فايده تم سيف يفكر( يعني منو هاه الي رقم ساروه وظهر من اهلنا ؟)

تااابع >>>

 

 

  رد مع اقتباس
قديم 19-04-2010, 03:52 PM   رقم المشاركة : 18
Сгαżч ƒшαℓℓα
~ • غـٍُالٌٍُيً مـٌٍُِألـًٍُِقَ • ~
 
الصورة الرمزية Сгαżч ƒшαℓℓα 





معلومات اضافية 
  النقاط : 2150
  الجنس :
  الدولة :
  الحالة :
الرسالة الشخصية

التقييم

افتراضي

 

 

عقب مل سيف من كثر مادق لسلطان جان يسير ويتسبح ويوم رد يبا يرقد سمع تلفونه يرن


المتصل :
ميود الخقاق

مايد : مرحبا
سيف : مراحب
مايد : شحالك ؟
سيف : يسرك حالي .. ومن صوبك ؟
مايد : والله الحمدالله .. الا اقلك تدري اني اليوم كنت عندكم فـ دبي
سيف : احلللللللف
مايد : والله العظيم حتى كنت فـ امارات مول .. اقلك شفت وحده غرشوبه والله انها قمر اتطيح الطير من السما اول ماسرت ورقمتها .... << جان يسكت
سيف : بلاك ؟ .. كمل
مايد : هاااه .. صح .. حتى شفت سلطون كان يدافع عنها
سيف انصدم : شووووووووووو ؟
مايد : بلاك ؟
سيف : يعني انت الي رقمت رضيعتي ساره ؟
مايد وهو انصدم الثاني : هاااي رضيعتك ؟!
سيف : هيه يا جليل الحيا والله انك ماتستحي وانا اقول بلاه سلطون حرج مره وحده والله لو انا الي شايفنك يمكن اذبحك
مايد : والله السموحه ماكنت ادري انها رضيعتك
سيف : اوكي خلاص مسموح بس والله ان عدتها مادري شو بسويبك
مايد : انشالله ما اعيدها

وتموا يسولفون شوي عقب سكر سيف من مايد وتم يفكر شوي عقب سار ورقد
وساره كانت يالسه فـ حجرتها جان مبايلها يرن
المتصل :
حياتي ميروه

انصدمت ساره لأن سلطان الي متصل فيها وكانت متردده لو ترد ولا بس اخر شي ماردت عليه عقب عشر دقايق بالضبط بعد مره رن تلفونها بس هالمره كان
المتصل :
توأم روحي

على طول ردت ساره
ساره : الوو
: زين يوم رديتي
انصدمت ساره : انت شو تبا مني ؟
: ساروتي والله انا آسف كنت محرج يعني واحد يغازلج فـ المول اسكت عنه ؟!
ساره : سلطان بليز خلاص انسى السالفه
سلطان : اوكي خلاص بنسى بس بشرط
ساره : آمر
سلطان : حلفي انج هب زعلانه مني
ساره : والله مب زعلانه بالعكس استانست لما مارضيت حد يغازلني
سلطان : فديـــتج والله
ساره : سلطان انا بسير ارقد الحين
سلطان : افاا .. شو ماتبين اترمسيني
ساره : .......
سلطان : اوكي خلاص برايج خذي بالج من روحج والله يحفظج يالغاليه
ساره : اوكي .. وياك يارب .. بااي
وبندت التلفون وسارت اتسبحت ولبست بجاما بنفسجيه ورقدت

ومن الصوب الثاني سلطان ارتاح لما عرف ان حياته هب زعلانه منه ورد تلفون ميره وسار تسبح ولبس بجامه ويلس يجلب فـ القنوات وتم يطالع فلم ويا ميره عقب ساروا ورقدوا ..


الصبح الساعه 11 ونص نشت ساره توجهت للحمام غسلت ويها بعدين سارت ولبست كندوره فوشيه ورسمت عيونها بالجحال وحطت جلوس وردي فاتح ولبست شيله سوده وعليها ورود بالوردي وتعطرت ونزلت تحت حصلت امها واعيه حبت امها عـ راسها وسارت عند ليني عسب تشوف لو فطورها زاهب ولا لأنها كانت ميته من اليوع
ساره : ليني وين فطوري؟
ليني : انا الحين جيب هدا روم مال اكل
ساره : اوكي بسرعه والله تراني ميته من اليوع
ليني : جيين جيين

سارت ليني عسب تشوف لو مرتينا مزهبه فطور ساره
وردت ساره حدرت عند امها جان تحصل راشد يالس
ساره : رشودي .. غرييبه شو الي موعيك الحين ؟!
راشد : اصغر عيالج يايتني من هناك رشوودي
ساره : ههههه .. خلاص انا آسفه يا الشيخ راشد
راشد : احم احم .. هيه جي ابااج
سيف وهو نازل تحت : صباااح الخير
الكل : صباح النور
ام راشد : سيفو وين ساير اشوفك متكشخ وحالتك حاله
سيف : هييهييهيي .. سلطون عازمني عـ الفطور .. فديته كرييم
راشد : وانا يعني مالي رب ولا انا ولد البطه السوده ؟!
ام راشد : البطه السوده تاخذك قول آمييين
ساره : هااهااهاا .. حراام امييه رشود بياخذ وحده حلوه شراتي
سيف : واايد مصدقه عمرج اصلا منو قا انج حلوه
ساره : جب جب .. مشكله الي يغارون
سيف حرج على ساره وتم يلحقها ويمط شعرها وهيه تصارخ
عقب ليني يت وقالت حق ساره ان فطورها زاهب
سارت ساره وتريقت
وفـ الصاله
حدر سلطان وسلم عليهم وسأل عن الحال
سلطان : سيفو يلا نمشي
راشد : سلطون يالي ماتستحي ولا تخيل انا ولد عمك العود ماتعزمني
سلطان قفط : والله السموحه منك .. شو اسويبك دومك مشغول ويا حرمتك يعني انا شو اسوي ..
ام راشد وهيه محرجه : اي حرمه بعد .. ( تطالع راشد ) رشود مسود الويه معرس من وراي
راشد وهو مسير ويا سلطان : سلطون يا الحمار ماقلتلك لاتخبر حد
سيف وياهم عـ الخط : هيه هااي الي ماخذنها بالسر ؟
راشد : هيه
ام راشد : حرجت : صدق هالرمسه يالتيوس
سلطان + راشد + سيف : هههههههههههه
ام راشد : يلا بسرعه قولولي من متى وهو معرس ها مسود الويه
ساره حدرت عليهم وسمعت امها لما قالت لهم يالتيوس بس ماتدري ان سلطان موجود
ساره : ههههههههههههههههه .. قالولهم تيوس تستاهلون .. واااك
سيف : اعوذ بالله انتي من وين ظهرتي
راشد : من بطن امك يعني من وين
ساره بدلع : ههههههههه
سيف : مالت على هالضحكه .. ترى مايليق تدلعين
ساره : افف افف .. مشكله الي يغارون .. اصلا انت تتمنى وحده شراتي
سلطان داش عرض : هيه والله صدقها
ساره لما شافت سلطان انصدمت لأنها ماتدري انه موجود وتخبلت لما شافته كان لابس برمودا جيشيه وبدي زيتي وكاب جيشي كان شكله طرررر
سيف : نعم نعم .. انت ليش داش عرض
ساره لا اراديا : هههههههههه
سلطان قفط : افاا يا سيفو اتقفطني
ام راشد : لا تغيرون السالفه قولولي متى مسود الويه عرس
سيف : سلطون اصلا معرس من زمااان
ساره انصدمت : اوونه
سلطان لاحظ عليها وحب انه يغايظها : صدق بس لاتخبرين حد
ام راشد : اكتملت رشود وسلطون معرسين بالسر ماباقي الا سيفو
ساره : اويييييييه من متى وانتو معرسين ؟!
سلطان : امممم .. من شهرين
ساره حرجت جان تسير حجرتها
راشد : اويييه هاي الهبله صدقت .. هب اتسير واتفظحنا مافينا
سلطان + سيف : هههههههه
ام راشد : يعني انتو هب معرسين
راشد : هيه بس كنا نبا انلعوزج .. ( وحبها عـ راسها ) السموحه يالغاليه
وساروا راشد + سلطان + سيف
ساره من سارت حجرتها وهيه مفوله وتقول فـ خاطرها
( يعني سلطان معرس .. انزيين من متى ؟ .. وليش كان يرمسني واونه يحبني ؟ .. يعني معقوله كان يلعب علييه ؟ .. لالا سلطان مايسويها .. انزين انا اشدراني لو هو معرس بالسر اكييد يروم يسوي كل شي .. بس ليش يا سلطان ليش .. يعني يوم انا حبيتك عرست )
وجاان اتصيييييح
وجان يرن مبايلها عـ صوت مسج شلت المبايل وبطلت المسج وكان المرسل سلطان

( ساروتي ترى كنا نتمصخر معاج هب اتصدقين )

ردت عليه ساره

( قص عـ وحده غيري )


وغلقت مبايلها

تم سلطان يطرشلها مسجات بس ماشي فايده واتصل فيها كمن مره بس كان مغلق
هو كان رايح بعيد عن راشد وسيف عسب مايكشفونه ويوم رد كان يغني


تقول القلب كيف انهيه عنك
يعاندي ولا يرتاح دونك
جتيل الحب واشواكي تعنك
واموت ان صار مغلق تيلفونك



راشد : ياويل حالي عـ الصوت بصراحه عجيييب
سلطان : خخخخخخ .. ادري
سيف : ها منو ها الي معذبنك وتلفونه مغلق
سلطان : آآآآه يا سيف هب بس معذبني
راشد : ها سلطون اشوفك حبيت .. منو هاي سعيده الحظ
سلطان : وحده الله يستر عليها
سيف : افاا .. يعني مابتقلنا
سلطان : انشالله يوم ثاني

وتموا يسولفون

فـ بيت قوم ميره

عبيد : اميييه ابا اسير عند سااروه ملل هني ميروه راقده وسلطون طلع انا يالس روحي
حصه : عبيد وبعدين ويااك بسك حنه .. انشالله نحن بنسرح اليوم العين عند عموتي مريم بتشوفهم كلهم هناك
عبيد : صدق .. ونااااسه .. انزين متى بنسير ؟
حصه : مادري والله يمكن بعد شوي انت سير عند اليسا خلها اتلبسك

 

 

  رد مع اقتباس
قديم 19-04-2010, 03:53 PM   رقم المشاركة : 19
Сгαżч ƒшαℓℓα
~ • غـٍُالٌٍُيً مـٌٍُِألـًٍُِقَ • ~
 
الصورة الرمزية Сгαżч ƒшαℓℓα 





معلومات اضافية 
  النقاط : 2150
  الجنس :
  الدولة :
  الحالة :
الرسالة الشخصية

التقييم

افتراضي

 

 

(اليسا البشكاره الخاصه لـ عبيد هيه الي اتوكله واتشربه واتبدله واتسبحه وهيه اندنيسيه وهيه ويا عبيد من اول ما انولد )



عبيد : اووهوو ويا هاي الابليسه
حصه : عيب عليك هاي اكبر عني شو ابليسه بعد اسمها اليسا اليسا افهم ياولد
عبيد : ماابااا
حصه : عبيد وبعدين
عبيد : اوكي اوكي خلاص
سار عبيد عند اليسا عسب اتلبسه ولبسته كندوره كركميه ومشطت شعره وعطرته كان شكله كيوووت
فـ الصاله

ميره : احمد .. ودني بيت عمي محمد
احمد : يعلج الموت بسج كل يوم عندهم ؟!
ميره : احمدوو لاتدعي عليه بالموت وبعدين متى سرت بيتهم والله حرام عليييك
احمد : انزين بتشوفينها فـ بيت عموو مريم
ميره : انزين ابا اسير وياها
احمد : يوم سلطون بي رمسيه خله هو يوديج
ميره : وانت شو شغلتك ؟ .. يالس فـ البيت اتغسل السياير
حرج احمد : اووهووو وبعدين

فـ هاي اللحظه حدر بو احمد الي هو حميد وسلم على عياله ويلس وياهم شوي عقب سار يبدل عسب يتجهزون لأنهم بيسرحون العين بعد شوي

سارت الساعه 12 والكل كان جاهز فـ بيت حميد .. بس كانوا يتريون سلطان لأنه لين الحين مايا حرج بو احمد ودق على سلطان واستعجله عقب يا سلطان وسرحوا كلهم رباعه بواحمد وبو راشد والشباب كلهم ساروا رباعه فـ سياره راشد

تقريبا عقب 1 ونص وصلوا العين يعني وصلوا الساعه 1 ونص مريم ( ام مايد ) و مايد وخميس و فاطمه وميثا


( مريم : هيه اخت حميد ومحمد وهيه عايشه فالعين وريلها متوفي من سنتين وهيه ربت عيالها احسن تربيه وعنها ولدين وبنتين ..

مايد : ولد مريم هو اسمراني وعيونه سوده وهب وايد طويل ومب واايد حلو يعني فيه جمال واحلى شي فيه عيونه الغاويه و هو وااايد خقاق وعمره 23 سنه وتوه يشتغل موظف فـ شركه عوده ..

خميس : اخو مايد هو واايد ويا خواته عكس مايد وهو واايد حليو طالع على امه وهو ابيظاني وشعره طويل وعيونه شرات عيون مايد وعمره 20 هو فـ اول سنه فـ الجامعه

فاطمه : هيه وخميس توم ووايد يتشابهون بس فاطمه طبعا احلى عن خميس بس هيه عيونها خضر وشعرها اسود طويييل وطبعا عمرها 20 وهيه بعد فـ اول سنه فـ الجامعه

ميثا : اخر العنقود واايد دلوعه وخقاقه ماخذه من مايد واايد وفيها شوي من فاطمه شوي وهيه فـ تاسع ابتدائي وعمرها 15 سنه .. )


كلهم نزلوا من السياره وسلموا على بعض عقب الحريم حدروا الصاله والرياليل الميلس .. سلطان كان محرج على مايد واايد من الحركه الي سواها فـ المول بس عقب ما مايد رمساه نسا السالفه وتموا يسولفون عقب مريم ( ام مايد ) قالت للحريم والريايل بنيلس برع لأن الجو كان عجييب الكل وافق طبعا البنات كانوا فوق يالسين يرمسون عن المدارس والجامعه وكل وحده تشكي الحال للثانيه
عقب سارتلهم مريم وقالتلهم ينزلون لأن الكل متيمع تحت فـ الحوي
عاد البنات ماصدقوا كل وحده تمت تتعدل وتتكشخ
فاطمه كانت لابسه ثوب اخضر وشيله سوده عليها رسومات اوراق شير بالأخضر وراسمه عينها بالجحال ..
وميثا لابسه ثوب بني ولابسه شيله سوده وعـ الاطراف ورود بنيه وراسمه عينها بالجحال ..
ميره و ساره مطقمين ويا بعض لابسين تنوره بيضه وعليها توب وردي وراسمين عيونهم بالجحال ..
يعني كلهم كان شكلهم عجيييب
نزلن البنات تحت جان ييلسن صوب الحريم وتمن يسولفن عقب سلطان سار بطل موتره وشغل اغنيه شارك الغي
وتم ايبس ويول والبنات ماصدقوا وساره بغت اتموت لما شافته كان شكله صدق صدق خباال لابس كندوره سوده ومتسفر بسفره حمره ولابس نظاره شمسيه وسيف كان مطقم وياه .. ومايد لابس كندوره بيجيه ومتسفر بسفره حمره وخميس مطقم ويا سيف وسلطان وكلهم نشوا تموا ايولون عااد خميس وسلطان لما ايولون محد يروملهم كان شكلهم عجييييب وعبيد الصراحه كان صدق مرتبش ويا الشباب
البنات تخبلوا والي اتظهر مبايلها واتصور والي مرتبشه وياهم وتبا اتسير واتيول والي اتغني ويا ميحد .. الين ماخلصت الاغنيه عقب يلسوا الشباب .. جان سيف يقول لسلطان شلنا شله سلطان استحى يشل جدامهم كلهم جان يقول لخميس يشل ويااه خميس فـ البدايه ماطاع بس عقب حنة الكل له طاع وقبل لا يشل سلطان قال بصوت عالي هاي الشله لناس ساكنين قلبي وعمرهم ماراح يظهرون منه وظهر مبايله وطرش لساره

( اكيييد لج انتي )

وطالع ساره وابتسم لها وقال

ياحبيبي حبك فدمي وسط قلبي والشرايني

رد عليه خميس

يوم اشوفك ينجلي همي ومن عنا الدنيا تنسيني

رد سلطان


الغوا والزين ملتمي فيك يا سيد المزاييني وكمل خميس

فيك كل الحسن متنمي من جدم لي حاجب العيني

كملوا هم الأثنين

ياحبيبي حبك فدمي وسط قلبي والشرايني
يوم اشوفك ينجلي همي ومن عنا الدنيا تنسيني

وسلامتكم


عاد هني ساره اتخبلت على صوت سلطان لأنه سلطان لما يشل ويغني صوته عذاااب حتى خميس صوته تقريبا فالشله شرات صوت سلطان والكل كان مستانس
عقب الكل سار وتغدى والبنات ردوا لمقرهم ( فوق ) وتموا يسولفون ويا بعض
فاطمه استأذنت منهن عسب اتسير تحت عند بشكارتهم وتقول لها اتيب للبنات فواله وقهوه وحلويات وهيه ظاهره من المطبخ بدون لاتنتبه دعمت واحد
هالواحد لما شافها اتخبل بجمالها وجمال عيونها الحلوات وهيه اتخبلت عليه
وتم يطالعها ويتأملها


 

 

  رد مع اقتباس
قديم 19-04-2010, 03:55 PM   رقم المشاركة : 20
Сгαżч ƒшαℓℓα
~ • غـٍُالٌٍُيً مـٌٍُِألـًٍُِقَ • ~
 
الصورة الرمزية Сгαżч ƒшαℓℓα 





معلومات اضافية 
  النقاط : 2150
  الجنس :
  الدولة :
  الحالة :
الرسالة الشخصية

التقييم

افتراضي

 

 

البارت الثالث / الفصل الاول

من عقب ما اتأملها وانصدم من جمالها الخلاب
: اسمحيلي الشيخه والله ماشفتج
فاطمه : مسموح .. بس عاد ثاني مره انتبه
: انتي بنت عمتي مريم ؟
فاطمه : هيه .. انت منو ؟
: افااا ماعرفتيني .. انا ولد خالج محمد
فاطمه : انت راشد ولا سيف ؟
: انا راشد
فاطمه : ايواا .. يلا عيل انا سايره عند البنات
راشد لا اراديا : ويين ويين اتريي
فاطمه انصدمت : بسييير
وعلى طول شردت راشد تم سرحان ويتذكر شكل فاطمه .. حليله الولد ين لما شافها وفاطمه الثانيه تمت اتفكر فـ راشد وفـ جماله وفـ شخصيته وفـ اسلوبه واتذكرته لما يال ويا الشباب كان الوحيد الي لفت نظرها وتمت تطالع يولته .. وهيه يالسه اتفكر وصلت الحجره عند البنات
ساره : بسم الله فطوم بلاج ؟ .. شي استوابج ؟
فاطمه : .........
ميره : فطووووووم
فاطمه : هااه هااه
ميره : هاا منو ها سعيد الحظ الي يالسه اتفكرين فيه ؟
ساره : اويييه فطوم اتحبين وماتخبريني ؟
ميروه : كح كح
ميثا : اييه انتو بلاكم على اختيه .. فديتها والله
فاطمه اتحاول تنسى الي صار : الا تعالوا شو مولات دبي ؟
ساره + ميره : طررر .. والله وناااسه
ميثا : فطوم قولي حق ميود ولا خموس يودونا العين مول
ميره : انا بقول حق سلطون .. بشوف بيودينا ولا
ساره : لالا انا بقول حق رشودي
فاطمه من سمعت طاري راشد ردت وسرحت فيه
ميثا : فطووووم .. بلاج اليوم هب طبيعيه ؟
فاطمه : ......
ساره + ميره : فطوووووووووم
فاطمه : هاا .. بلاكم جي حشره
ساره : انا الا اعرف منو ها الي محتل على عقلج وكل شوي اتفكرين فيه
فاطمه : محد
ميره شلت تلفونها واتصلت بـ سلطان
ميره : الو سلطون
سلطان : نعم امري
ميره : سلطون ساروه تبا تسير العين مول
البنات كلهم اطالعوا ساره .. حليلها ساره قفطت وظربت ميره
سلطان : من عيوني( وابتعد عن الشباب) انزيين هيه وينها الحين ؟
ميره : هاذي واقفه عندي
سلطان : انزين ابا ارمسها
ميره : عييب منقووود
سلطان : ميرووه حبيبتي عشااني
ميره : بسألها الاول
ميره سألت ساره بس طبعا سارت ماطاعت حرج سلطان وقال عيل ماشي ظهره للعين مول وبند التلفون فـ ويه ميره حرجت ميره وتمت تتحرطم عـ راس ساروه وساره مفوله عـ الآخر .. عقب ساره شلت على اساس انها اتدق على راشد وهيه من كثر ماكانت مفوله ما انتبهت عـ الرقم وظهر واحد
: مرحبا بهالصوت
ساره : رشود بلا عبط
: فديييتج انا .. لا حبوبه مغلطه فـ الرقم انا هب راشد
ساره : اوييه اسمحلي والله بالغلط
: اوكيه ممكن نتعرف ؟
ساره : صدق انك جليل الحيا وبندت التلفون فـ ويهه

وردت دقت بس هالمره لراشد رد عليها راشد وتمت تتمصلح معاه واتقردنه لين ما طاع يظهرهم .. سارت ساره عند البنات وبشرتهم ان راشد راح يوديهم العين مول وقالتلهم يلبسون عبيهم الحين بسرعه هو يتريا فـ السياره .. كلهم لبسوا عبيهم ويوم نزلوا حصلوا الشباب كلهم متيمعين عند سياره راشد .. راشد تم يطالع فاطمه ، فاطمه استحت ونزلت راسها ، وسلطان اونه زعلان من ساره لأنها ماطاعت اترمسه وهيه مول هب مسوتله سالفه ولا معبرتنه موول .. ومايد الي متخبل يالس يطالع ساره ومحد لاحظ عليه غير خميس الي يالس يعلق علييه

ميثا +فاطمه +ميره +ساره +حصه فسياره راشد
و خميس + سلطان + سيف + عبيد +احمد فسياره مايد

ساروا كلهم العين مول لما وصلوا البنات تموا يتمشون ويا حصه والشباب يالسين فـ الكوفي شو ظحك وسوالف وتعليقات وتقردين << عاد سوالف الشباب

صوب البنات
دخلوا محل من المحلات الي فالمول ،و قرروا انهم ياخذون بدل شرات بعض يعني كلهم يطقمون وتموا يدورون لين ماعيبهم تنوره ورديه وعليها حركات بالبني وخذوا عليه توب بني وساروا شومارت وخذوا نعلان شرات بعض عقب ساروا لايف ستايل وخذوا اكسسوارات حق البدله والنعالي الي شروهم طبعا الاكسسوارات كل وحده خذت عـ ذوقها .. عقب حدروا نعومي تمت كل وحده منهن تختار لها بجاما حلوه عقب دفعوا وظهروا
سارن البنات عند الشباب لأنهم خلصوا شوبنق وراتاحوا نفسيا
ساره : رشود والله تراني يعت .. اعزمنا نحن عـ مطعم عـ ذوقك وحسابك
راشد : من عيوني كم ساره عندي
ساره هني شقت الحلج اونها عاد وسلطان كان مغيظ عليها لأنها كانت اتغايظه وموول مب مسويتله سالفه ولا ترد على مسجاته
سار راشد ووياه البنات والشباب وعزمهم عـ ماكدونلز كل وحده طلبت الي تباه كلهم اتعشوا وشروا ايس كريم من باسكن طبعا كله على حساب راشد عقب ردوا لبيت عمتهم مريم ..
ردوا البيت وهم متأخرين ألحين ميره و ساره باجر عليهم مدارس والعين لين دبي درب تموا يتحرطمون الين ماوصلوا البيت ميره سارت ترقد فـ بيت عمها محمد وقالت حق سلطان ايبلها كل اغراضها واتسبحوا هم الهنتين ورقدوا لأن باجر وراهم دوامات من صباح الله خير ..
وسيف رد واتسبح وورقد .. لأنه كان صدق تعبان
سار سلطان البيت واتسبح عقب سار عند امه وقالها اتجهز اغراض ميروه لأنه باجر الصبح بيسير بيت عمه عسب يوديلها اياه وعقب توجه لحجرته وسار ورقد .. اما راشد سار واتسبح وحاول يرقد بس مارام تم واعي روحه يالس فـ الصاله الصغيره ( الي فوق ) وتم يقلب فـ القنوات وماحصل شي حلو يتابعه سكر التلفزيون ويلس يفكر فـ الملاك الي شافه اليوم ( فاطمه ) وتم يقول فخاطره:
( معقوله انا حبيتها .. لالا مستحيييل يمكن بس عيبتني .. انزين هيه شو اسمها .. صدق اني غبي يعني ليش ماسألتها عن أسمها .. انزين انا شو يهمني ؟ .. وليش يالس افكر فيها لهالدرجه؟ )
وتم على هالحاله لين ما مل وحس بأنه محتاج يرقد وسار ورقد
وطبعا ام راشد وبو راشد وام احمد وبو احمد اول ما ردوا اتسبحوا واتعشوا روحهم ورقدوا..

فـ العين
صوب بيت مريم ( ام مايد )

مريم سارت واتلبست ورقدت وميثا بعد اتسبحت وانسدحت عـ الشبريه وفاطمه من ساعة ماظهروا وهيه هب طبيعيه وحليلها منو منها من رشود الي معذبنها .. هييهييهيي
ردت تتذكر الي صار بينهم واشقايل دعمته واسلوبه لما يرمس وكانت متخبله عليه وعـ شكله
( راشد : طويل وحنطاوي وعيونه عسليه وشعره هب وايد طويل شوي وعمره 25 سنه ومثل ماقلتلكم هو الثاني يشتغل فـ شركة ابوه وعمه وهو يديرها حاليا بس طبعا ها مايمنع تدخل محمد وحميد )
وتمت اتفكر فيه لين مارقدت ..
وخميس ماكان متفيج يلعوز مايد مع انه كان حاط فـ باله انه يعلق عليه ويلعوزه ويسأله شو سالفته على بنت خاله بس كان تعبان شوي سار اتسبح ورقد لأن وراه نشه من صباح الله خير ..
ومايد عاد ها محد ايي صوبه كان متخبل سرحان يفكر فـ سارونه كانت ماخذه كل تفكيره ومره وحده اتذكر الموقف لما كانوا فـ امارات مول لما رقمها ويا سلطان وكفخه حس بغيره لأنه سلطان تقريبا مجابلنها 24 ساعه لأنه وااايد ويا اخوها سيف اكييد يسير بيتهم ويشوفها وتم يفكر ويفكر .. حليله شكله صدق حب ساره وتولع ابها ..

سارت الساعه 2 ونص المسا ابطالنا كلهم استسلموا للنوم ومحد منهم تم واعي ..
وعـ الساعه 6 ونص صباحا فـ بيت بو راشد تحديدا فـ حجره ساره
ليني تمت حاشره الدنيا عسب اتوعيهم مره عند ساره ومره عند سيف عقب رن الجرس سارت وبطلت الباب حصلت سلطان عطاها اغراض وقاللها توده لميره ، وتوعي سيف لأنه بيسير اليوم من وقت .. ( طبعا هم دوم يسيرون الساعه 8 ص .. بس هالمره مادري شو ياينهم يبون يسيرون يتحوطون شوي عقب يسيرون يتريقون فـ كوفي بس هالمره على حساب سيف عقب بيسيرون الجامعه ) سارت ليني تسوي الي قالها عليه سلطان .. وعت ساره وميره وعطتها اغراضها وسارت اتوعي سيف حصلته ظاهر وكان شكله طرر لابس كندوره بيضه ومتسفر بسفره حمره ومتعطر .. ( طبعا مرااات بتلاحظون ان سيف وسلطان يطقمون ويا بعض لأنهم واايد ويا بعض فـ يحبون يكونون شرات بعض ) وهالمره بعد سلطان كان مطقم ويا سيف ..
من نشت ساره سارت الحمام وغسلت ويها ولبست لبس السكول الي هو ( قميص ابيض عليه مريول كحلي ) ومشطت شعرها وسشورت قصتها واتجحلت ... الخ << بعد لازم حركات البنات.. طبعا ميره لازم شراتها
عقب نزلوا تحت عسب يتريقون حصلوا سلطان وسيف كانوا يالسين
ساره : اعوذ بالله بلاكم يالسين من صباح الله خير
سلطان لف ويهه اونه بعده زعلان على سالفة البارحه
ميره كانت تدري ان سلطان شل بخاطره سارت ويلست عنده
ميره : سلطون حبيبي بلاك ؟
ساره وهيه تطالع ميره وسلطان
سلطان : ماشي
ميره : افاا يا سلطون ماهقيتك اتخش شي عليه
سلطان : خلاص حبيبتي عقب بخبرج
ساره من سمعت سلطان يقول لميره حبيبتي اونها غارت جان اتحرج وتظهر خاري سيف تم يظحك عليها وسار صوبها
سيف : بلاج ؟ .. ماتبين تتريقين ؟
سلطان لحق سيف على اونه يبا يرمسه بس هو اصلا ياي عسب يشوف ساره
ساره من شافت سلطان نزلت راسها : لا مابا مو مشتهيه اكل ..
سيف : خخخخخ .. سيري كلي والله روحج ظعيفه مافيه اتموتين علينا
سلطان استانس لأنه قهر ساره وخلاها اتحرج عليه
ساره سارت عند سيف وحظنته وحبته ع خده وسلطان يطالها ومقهور على حركتها
ساره : فدييتك يا خوي لهالدرجه اتحبني ؟
سيف: واكثر يا قلبي انتي
هنييه ساره استانست : خلاص عشانك بسير آكل ..
(تحركت شوي جان توقف وتصد لـ سيف) .. سيفو قول لـ عبد الكريم يشغل السياره لأنه نحن جاهزين بس باكل وبنتحرك ..
( عبدالكريم : هو دريول قوم بو راشد وهو الي يودي ويب ساره من المدرسه وتستخدمه عوشه ( ام راشد ) لو تبا تسير مكان )
سيف صد يرمس سلطان
سيف : سلطون شرايك اليوم انوصل البنات مدرستهم ؟
سلطان ماصدق كان يباها من الله : اوكي ليش لا
سارت عنهم ساره وحدرت حجره الاكل شافت ميروه يالسه اتدح
ساره : هههههـ بالعافيه حبيبتي
ميره : الله يعافيج
ساره يلست حذال ميره وكلت وياها وخلصوا وساروا يابو شنطهم وركبوا سياره سلطان ..
وطول الدرب وهم صاخين ساره كانت يالسه ورا سلطان وسلطان هو الي كان يسوق وسيف يالس عند سلطان يدام وميره يالسه ورا ويا ساره .. سلطان حط المنظهر على ويه ساره وكل شوي يطالعها ساره حست ان سلطان كان يطالعها لما رفعت راسها شافته من المنظره اونها تبا ترقد جان تتغشى حرج سلطان عقب بطل عـ المسجل عـ ميحد حمد

تاابع>>

 

 

  رد مع اقتباس
قديم 19-04-2010, 03:56 PM   رقم المشاركة : 21
Сгαżч ƒшαℓℓα
~ • غـٍُالٌٍُيً مـٌٍُِألـًٍُِقَ • ~
 
الصورة الرمزية Сгαżч ƒшαℓℓα 





معلومات اضافية 
  النقاط : 2150
  الجنس :
  الدولة :
  الحالة :
الرسالة الشخصية

التقييم

افتراضي

 

 

يا صباح النور من بعد العتيمه
يا صباح النرجسي من بين ثمره
يا صباح الخير والورد ونسيمه

عقب وصلوا البنات مدرستهم وساروا الشباب يحوطون << والله متفيجين

فـ العين تحديدا فـ بيت مريم

نشن البنات رواحهن وسارن واتلبسن وسارن ويا الدريول .. والشباب مايد سار شغله وخميس سار الجامعه عـ الساعه 7 ونص ..
فـ بقعه ثانيه فـ دبي دار الحي
كانت تسكن عايله اخت عوشه ( ام راشد )

سالم الـ ..... (بو عبدالله )
روضه الـ .... ( ام عبدالله )

(عبدالله : هو ربيع راشد وواايد ويااه حتى هو كبره بس هالفتره منقطعين عن بعض شوي وهو عمره 25 سنه وهو يشتغل اعمال حره ، وهو اسمراني عيونه سوده وطويل وفيه جمال..
ظبيه : هيه كبر ساره وميره وهيه واايد اتحب ساره وتعتبرها اختها وظبيه حنطاويه عيونها سوده واسعه وشعرها اسود طويل وكانت ظبيه وااايد حلوه ورقيقه وهيه عمرها 18 وهيه بعد فـ الثانويه عامه ..
سعيد : هو اصغر عن ظبيه بسنه دوم يظارب وياها وهو اسمراني وعيونه سوده ومعروف بالتقردين )

روضه ( ام عبدالله ) : عبدالله شوف اختك ظبيه اليوم بعد غايبه .. هاي البنت عيزتني ..
عبدالله : هيه وينها الحين .. راقده ؟
ام عبدالله : والله ما ادريبها حابسه عمرها فـ الحجره
عبدالله : خلاص ماعليج امييه انا برمسها
وسار عبدالله عند حجره ظبيه

طق طق طق

ظبيه : تفظل
عبدالله : يزيد فضلج
ظبيه : اووه انا اقول ليش حجرتي نورت عبود ياي فـ حجرتي يا هلا ومرحبا
عبدالله شق الحلج : هههههه .. تسلمين حبيبتي .. الا تعالي بلاج انتي تبين اتخبلين امييه .. دومها تشتكي منج
ظبيه : عبود والله حراام عليكم انا مريضه .. يعني تبوني اسير اداوم عسب اموت
حدر سعيد عليهم
سعيد : ههههههههههه .. احسن عسب نفتك منج ..
عبدالله : سعود !! .. انت بعد هب مداوم ؟
ظبيه : هيه الاخ اليوم مواعد وحده .. وااك وااك
سعيد : جب انتي شو اتغارين ؟!
عبدالله : سعود انا ارمسك
سعيد : السموحه اخوي والله انا تعبت نفسيا من المدرسه خلااص ابا اعرس
ظبيه : ههههههههههه .. منو هاي تعيسه الحظ الي بتاخذ اسميها بتندم عـ اليوم الي شافتك فيك ..
حرج سعيد ومط شعرها .. صاحت ظبيه
عبدالله حرج : سعود وبعدين ويااك .. انت ريال والريايل مايمدون ايدهم عـ الحريم
سعيد : شوفها هيه الي بدت
ظبيه وهيه تصيح : اسكت يالحمار .. ( جان اتزاعق ) .. اظهر من حجرتي اظهر ..
سمع سالم ( بوعبدالله ) صوت ظبيه وسار حجرتها ويلس عندها وحظنها وواجع سعيد .. عاد سعيد قفط .. (على فكره ترى ظبيه دلوعة ابوها) .. عقب عسب يراظي ظبيه وداها الشيشه عسب تاخذلها شي تاكله عقب ردها البيت وسار شغله

فـ بيت بو احمد تحديدا فـ جناح احمد وحصه

حصه : احمد شوف ولدك تراني تعبت معااه هب طايع يسير الحضانه
احمد : هههههه .. هابعده على حالته .. خلاص انا الحين بسير ارمسه
بس وينه فـ حجرته ولا نزل عند امييه ؟
حصه : فـ حجرته
احمد : اوكي .. شوفي انا بوعيه بخليه اي عندج انتي لبسيه وكل شي وانا بنزل بس قبل لا انسى اليوم انا عازمنكم انتي وعبيد على مطعم يديد بطلووه روعه الصراحه
حصه : هههه .. انت همك بطنك .. اوكي حبيبي
احمد : يا ويل حالي حصوصتي قالتلي حبيبي .. وغلاتي عندج عيديها
حصه دزته : سيرسير وراك شغل
احمد : انزين بس عيديها وبسير
حصه وهيه مستحيه : حبيبي
احمد : يا ويييل حالي كم بعيش انا
حصه دلع : احمد
احمد : عيون احمد .. قلب احمد .. روح احمد .. كل احمد
حصه استحت : بس عااد والله استحي
احمد : وفديييت الي يستحون
حصه : احمداني يلا عااد سير ووع عبيد اقلك وراه حضانه
احمد : انزيين .. بس ابا بوسه
حصه تسوي عمرها حرجت : احمد وبعديين يلا بسرعه
ضحك احمد : وقالها .. افاا يا حصوو ماتعطيني بوسه .. ( واونه زعل وسارصوب حجرة عبيد )
تم يلعوز عبيد لين مانش عبيد كان يالس يتحرطم ويصييح اونه مايبا يسير الحضانه .. يعني كانت حالته حاله

فـ مدرسة قوم ساره

ميره وساره ساروا صفهم شافوا بنات الشله يالسين
( بنات الشله هم جوري ومزون وبثينة وساره وميره )
كانوا شله ولا اروع شله عجييبه الصراحه

( جوري : بنت دلوعه وضعيفونه وهيه بيضه وشعرها كستنائي وعيونها بنية وهيه وااايد تحب وترتاح لساره وبنات الشله الباقيه ..
مزون : بنت حشره وربشه ولسانها طويل محد يرومله وهيه شوي دبه وهيه سمره وعيونها سود وشعرها اسود ..
بثينه : عاد هااي غير كل اسبوع اتحب لها واحد وهيه واايد حبوبه وحساسه وهيه حنطاويه وشعرها اسود وعيونها سود )

مزون : مرحبا مرحبا .. والله توه نور الصف
جوري : وانا اقول ليش الصف كان مظلم
بثينه : انزين ليش مابطلتي الليت
الكل : ههههههههههه
جوري : ياربي يا بثون دمج ثجيييل
ساره : اوووه تونا ياين .. انتو دومكم جي لااازم تضاربون
مزون : ماعليج من هذيله المخبل .. المهم قوليلي شحالج ؟ .. شخبارج
ساره : الحمدالله تمام ومن صوبج ؟
مزون : والله الحمدالله .. ( واتطالع ميره ) .. ها ميروه اشوفج هاديه شو السالفه ؟
ميره : خخخخخ .. يالسه اطالع جوري وبثون والله انهم بقر
الكل : ههههههههههههه
بثون + جوري : ميروووه عن الغلط
ميره : ههههه .. السموحه
ساره : ها وين سرتوا في الويك اند ؟
مزون : الله يسلمج نحن طايحين فالعزبه 24 ساعه
جوري : الله ونااسه جان خذتيني وياج
مزون : شو ابابج ؟ .. المهم حسون حبيبي كان هناك
بثينه : مااالت
مزون : عليج وعلى كل الي حبيتيهم والي بتحبينهم
بثينه : اييه .. حراام عليج خلاص انا بتم على حمد
جوري : هااهااهاا .. ظحكتيني وانا مافيه ظحكه .. الحين منو يصدق ان بثون بتعيش بدون ماتحبلها كل يومين واحد ؟
بثون : جب جب ليش اتغارين ؟
جوري : الحمدالله ما اغار
ميره : هدوا هدوا بلاكم ؟
بثون : هييه صح ساروه اخوي خليفه يسلم عليج
ميره وهيه مصدومه : هاااه منو خليفه بعد ؟
مزون : طاع الذكاء الخارق .. توها تقول اخوها .. بلاج مشفره ؟
ميره وهي قافطه : هييهييهيي .. ال قصدي من متى اتعارفه ؟
مزون : اهااا
ساره : هههههههه .. الله يسلمه
ميره تهمس فـ اذن ساره : ماعليه ان ماخبرت سلطون
جوري سمعتها : هااا .. منو سلطون هذا ؟
هنييه ساره قفطت واحمرت واخضرت واصفرت << حشى اشارات المرور هب ساره .. هع
مزون : افاا ياساروه ماهقيتها منج
بثينه : تؤتؤتؤ اتخونين اخويه وهو الي ذابح عمره عشاانج
ميره : اييه بسكم عااد مب على مرت اخوي
الكل : اوووب اوووب اوووب ساروه منو قدج

وجان يدق الجرس عـ الحصه الأولى
تررررررررررررررن

الكل : اعععععععععع ..
ساره : شو علينا الحين ؟
مزون : اظني برج العرب
بثينه : اويييه منو هاي بعد ؟
جوري : هههههههههه .. اي ثنك انها مس ابتسام
ميره : لالالا خل اللقب القبلي احسن
مزون : دراكولا ؟
ميره : هيه
وجان اتيهم المس


فـ بقعه ثانيه صوب سلطان وسيف فـ هالوقت كانوا قاعدين فـ كوفي شوب يالسين يتريقون وكانت الساعه 8 الا ربع
سيف : سلطون اتأخرنا
سلطان كان سرحان
سيف : سلطووون وصمخ جلااب
سلطان توه وهو منتبه : هاا بلاك ؟
سيف : انا ابا اعرف انت عاشق ؟
سلطان : آآآآآآه
سيف : بلاك يا رياال ؟
سلطان : ماشي ماشي
سيف : افاا انا ربيعك وحسبة اخوك اتخش عني افاا والله افاا ماهقيتها منك
سلطان : سيف دخيلك افهمني
سيف : اشو افهم اني اخبرك بكل شي وانت هب طايع اتخبرني
سلطان : سيف لو خبرتك بتفهمني غلط ويمكن اتحرج علييه بعد وانا مابا اخسرك
سيف وهو محرج : اشو تبا اتفهمني انك اتحب اختي ساره ؟

كــــــــــات
يتبع

 

 

  رد مع اقتباس
قديم 19-04-2010, 03:58 PM   رقم المشاركة : 22
Сгαżч ƒшαℓℓα
~ • غـٍُالٌٍُيً مـٌٍُِألـًٍُِقَ • ~
 
الصورة الرمزية Сгαżч ƒшαℓℓα 





معلومات اضافية 
  النقاط : 2150
  الجنس :
  الدولة :
  الحالة :
الرسالة الشخصية

التقييم

افتراضي

 

 

بسكم عاااااااااد وايد دلعنااكم

السبوع الياي ان شاء الله بكمل

 

 

  رد مع اقتباس
قديم 19-04-2010, 05:57 PM   رقم المشاركة : 23
همس الأمل
~ • غـٍُالٌٍُيً ذًٍُِّهـًٌٍُِبًٍَُِيًِ • ~
 
الصورة الرمزية همس الأمل 





معلومات اضافية 
  النقاط : 1400
  الجنس :
  الدولة :
  الحالة :
الرسالة الشخصية

التقييم

افتراضي

 

 

ناااااااااااااااااااايس

 

 

 **يارب تهديني قبل لحظة {الفوت} **

**وتغفر ذنوبي يا كريم {العطايا}**



  رد مع اقتباس
قديم 19-04-2010, 08:47 PM   رقم المشاركة : 24
.. τңβ7ЙЏ 7βқ
~ • غـٍُالٌٍُيً ذًٍُِّهـًٌٍُِبًٍَُِيًِ • ~
 
الصورة الرمزية .. τңβ7ЙЏ 7βқ 




معلومات اضافية 
  النقاط : 785
  الجنس :
  الدولة :
  الحالة :
الرسالة الشخصية

التقييم

افتراضي

 

 

الله حبييييييت البارت واااااايد..>>>>حلفي بس

طانكيوؤ فديييتج.,

نتريا الياي ع احر من اليمر..

 

 

  رد مع اقتباس
إضافة رد

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

الساعة الآن 07:57 PM.


Powered by vBulletin® Version 3.8.7
Copyright ©2000 - 2019, Jelsoft Enterprises Ltd